बिरामीले पैसा तिरेर रगत लिनुपर्ने बाध्यता अन्त्य गरिनेछ – अध्यक्ष प्रचण्ड



काठमाडौँ, नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले रगतको अभावमा छट्पटाइरहेका बिरामीले पैसा तिरेर रगत लिनुपर्ने बाध्यताकोे अन्त्य हुनुपर्ने बताएका छन ।
नेपाल स्वयंसेवी रक्तदाता समाजद्वारा आज काठमाडौँमा आयोजित १४ औंँ राष्ट्रिय स्वयंसेवी रक्तदाता दिवस समारोहमा उनले “दाताले रगत दिइरहने तर पीडितले पैसा तिरेर मात्रै रगत लिनुपर्ने अन्तरविरोधको समाधान छिटो भन्दा छिटो हुनुपर्दछ ।”


अध्यक्ष दाहालले नेकपाको अध्यक्ष र सरकारको नेतृत्व गर्ने पार्टी नेताको हैसियतमा अन्तरविरोध समाधान गर्न आफूले पूर्ण सहयोग गर्ने प्रतिबद्धता व्यक्त गरे ।

समारोहमा राष्ट्रिय समाचार समिति (रासस) का महाप्रबधक ओपेन्द्र शर्माले समाजले रक्तदान अभियान सञ्चालन गरेर समाज र राष्ट्रलाई महत्वपूर्ण योगदान पु¥याएकोमा प्रशंसा गर्दै रगतको अभावले अस्पतालको श्ययामा छटपटाएर मर्नुपर्ने अवस्थाको अन्त्य गर्न जरुरी भएको प्रस्ट पारे ।

उनले यस्ता अभियान सञ्चालन गर्ने सङ्घ संस्थालाई सरकारले सहयोग गर्नुपर्नेमा जोड दिए । उनले “यो अभियान राज्यलाई नै रगतको नाता जोड्ने अभियान हो, तर रगत लिएर पोको पार्ने मात्रै नगरी सही सदुपयोग हुनु अर्काे महत्वपूर्ण कुरा हो”, महाप्रबन्धक शर्माले प्रकाश पारे ।

नेपाल ललितकला प्रज्ञा प्रतिष्ठानका कुलपति कान्छाकुमार कर्माचार्यले जीवनको आधार नै रगत हो भन्दै रगतलाई सर्वसुलभ र सहज कसरी बनाउन सकिन्छ भन्नेतर्फ ध्यान दिनुपर्नेमा जोड दिए ।

नेपाल रेडक्रम सोसाइटीका केन्द्रीय महामन्त्री देवरत्न धाख्वाले कुनै पनि ठाउँमा रगत उत्पादन गर्ने कुरा नभइ मान्छेले नै मान्छेलाई दिनुपर्ने हुँदा रगत दानका लागि सर्वसाधारणमा चेतना र प्रोत्साहन जरुरी रहेको बताए । रासस

Leave a Reply

Your email address will not be published. Required fields are marked *

Back to top button