ज्येष्ठ पत्रकारलाई मासिक तीनहजार पेन्सन दिईने



वागमती प्रदेश सरकारले पत्रकारको हकहितका लागि पेन्सन दिने व्यवस्था शुरु गर्न लागेको छ। वागमती प्रदेश सरकारको प्रेस रजिस्टारको कार्यालयले ३० वर्ष पत्रकारिता गरेको र ६० वर्ष उमेर पूरा गरेका ज्येष्ठ पत्रकारलाई पेन्सन दिने व्यवस्था शुरु गर्ने लागेको हो। वागमती प्रदेशका ज्येष्ठ पत्रकारलाई मासिक तीन हजारका दरले पेन्सन दिने व्यवस्था शुरु गर्न लागेको प्रेस रजिस्टारको कार्यालयले जनाएको छ। पेन्सनका लागि सरकारले १५ लाख बजेट छुट्याइएको बताइएको छ। त्यस्तै दुर्घटनामा मृत्यु भएका पत्रकारलाई ५० हजार आर्थिक सहायता दिने कार्य्विधिसमेत पारित भएको प्रेस रजिस्टार रेवती सापकोटाले जानकारी दिए। ’दुर्घटनामा परेर घाइते भएका पत्रकारलाई ३० हजार दिने र क्यान्सर तथा मिर्गौला रोगबाट पीडित पत्रकारलाई ७५ हजारसम्म सहयोग गर्ने योजना सरकारले अगाडि सारेको छ’, उनले भने, ’सुत्केरी पत्रकारलाई प्रोत्साहनस्वरुप ३० हजारका दरले चारवटा फेलोसिप दिने योजना पनि प्रदेश सरकारको छ।’ प्रेस रजिस्टारको कार्यालयबाट हालसम्म करिब १०० पत्रकारले परिचयपत्रसमेत प्राप्त गरेको बताइएको छ। वागमती प्रदेशका आन्तरिक मामिला तथा कानुनमन्त्री शालिकराम जम्मकट्टेलले प्रदेश सरकारले पत्रकारको हकहितका लागि कानुन निर्माणका साथै विभिन्न कार्याक्रम ल्याएको जानकारी दिए। प्रदेश सरकारले पत्रकार कल्याणकरी कोषको स्थापना गर्ने तयारी गरेको उल्लेख गर्दै उनले आफू श्रमजीवी पत्रकारका पक्षमा उभिएको बताए। रासस


Leave a Reply

Your email address will not be published. Required fields are marked *

Back to top button